कञ्चनपुर । कञ्चनपुर, पुनर्वास–३ की बसन्ती चन्द अब घर खर्चका लागि अरूको मुख ताक्नुपर्दैन। युट्युबबाट सिकेको सीप र सहकारीबाट लिएको सानो ऋणको सहारामा उनले सुरु गरेको केक, पेष्टी र बदाम सेकको व्यवसाय अहिले मासिक ६० हजार रुपैयाँभन्दा बढीको कारोबारमा परिणत भएको छ।
कोरोना महामारीले गाउँकै विद्यालयको जागिर गुमेपछि बेरोजगार भएकी बसन्तीले उद्यम गर्ने अठोट त गरिन्, तर लगानीको अभावले दिशा भेटेकी थिइनन्। यत्ति बेला स्थानीय सृजनशील बचत तथा ऋण सहकारीले उनलाई नयाँ बाटो देखायो।
“इन्टरनेट हेर्दै व्यवसायीक आइडिया खोज्थेँ, केक र बदाम सेक सजिलो लाग्यो,” बसन्ती भन्छिन्। उनले एक लाख रुपैयाँको लगानीबाट व्यवसाय सुरु गरिन् र अहिले पाँच लाखभन्दा बढीको सामग्री थपिसकेकी छन्।
व्यवसाय बढ्दै जाँदा उनले गिफ्टका सामग्रीसमेत बेच्न थालिन् र मासिक आठ हजार रुपैयाँ सहकारीमै बचत गर्न थालेकी छन्। “पसलकै आम्दानीले घर चल्छ, छोरीको पढाइ पनि यही आम्दानीबाटै हुँदैछ,” बसन्तीको गर्विलो भनाइ छ।
सफलताको कथा बोकेकी बसन्ती अब स्वरोजगारका लागि प्रेरणादायी पात्र बनेकी छन्।
प्रतिक्रिया