डोटीमा मिनीट्रक दुर्घटना: चालकसहित तीन जनाको मृत्यु

कैलाली। डोटी जिल्लाको जोरायल गाउँपालिका–१ गोल्डेनमा भीमदत्त राजमार्गअन्तर्गत आज बिहान भएको मिनीट्रक दुर्घटनामा चालकसहित तीन जनाको ज्यान गएको छ।

दुर्घटनामा परी मृत्यु हुनेमा बझाङको बुङ्गल नगरपालिका–२, दहबगरका अर्जुन धामी रहेका छन् भने अन्य दुई जनाको पहिचान खुल्न बाँकी रहेको जिल्ला प्रहरी कार्यालय डोटीका प्रमुख एसपी बिनोद शर्माले जानकारी दिएका छन्। धनगढीबाट बझाङतर्फ खाद्यान्न बोकेर जाँदै गरेको सुदूरपश्चिम प्रदेश ०१–००१ ख ३४२८ नम्बरको मिनीट्रक अनियन्त्रित भई करिब ५० मिटर तल सडकबाट खसेको थियो।

दुर्घटनापछि सुरक्षाकर्मी तथा स्थानीयवासीको सहयोगमा उद्धार कार्य गरिएको छ। घटना सम्बन्धी थप अनुसन्धान भइरहेको प्रहरीले जनाएको छ।