गर्मीमा छालाको टोनिङ हटाउन घरेलु उपायहरू: प्राकृतिक सौन्दर्यको राज

काठमाडौं । गर्मी याममा छालाको उचित हेरचाह अनिवार्य हुन्छ। कडा घाम, अत्यधिक गर्मी र धूलो–धुँवाले छालामा गहिरो असर पार्छ, जसले गर्दा छालाको रङ कालो र नीरस देखिन थाल्छ। प्राकृतिक चमक हराउँदै जान्छ र अनुहार म्लान भएपछि आत्मविश्वाससमेत घट्न सक्छ। यस्तो अवस्थामा केमिकलयुक्त सौन्दर्य प्रसाधनको प्रयोगभन्दा प्राकृतिक उपायहरू अपनाउनु उपयुक्त हुन्छ।

यहाँ हामी तपाईंलाई घरमै सजिलै अपनाउन सकिने, टोनिङ घटाउने केही प्रभावकारी घरेलु विधिहरूको जानकारी दिँदैछौं:

१. कागती र गुलाब जलको संयोजन

कागती प्राकृतिक ब्लीचको रूपमा काम गर्छ। यसमा पाइने प्रशस्त भिटामिन सीले छालाको मृत कोशिकाहरू हटाएर चमक फिर्ता ल्याउँछ। गुलाब जलमा कागतीको रस मिसाएर टोनिङ भएको भागमा लगाउनुहोस्। करिब १०–१५ मिनेटपछि मनतातो पानीले धुनुहोस्।

२. एलोवेराको जेल प्रयोग

एलोवेरा छालालाई हाइड्रेट मात्र नगरी टोनिङ हटाउन पनि उपयोगी हुन्छ। ताजा एलोवेरा जेल निकालेर अनुहारमा १५–२० मिनेट लगाउनुहोस् र त्यसपछि चिसो पानीले सफा गर्नुहोस्। यो छालालाई शान्त बनाउँछ र नरम बनाउँछ।

३. दही र बेसारको फेस प्याक

दहीमा रहेको ल्याक्टिक एसिडले छालाको सतह सफा गर्छ भने बेसारको एन्टिअक्सिडेन्ट गुणले छालाको रङ सुधार गर्छ। एक चम्चा दहीमा एक चिम्टी बेसार मिसाएर अनुहारमा लगाउनुहोस्। १५–२० मिनेटपछि धुनुहोस्। नियमित प्रयोगले छालामा प्राकृतिक चमक फर्किन्छ।

४. ओटमिल स्क्रब

ओटमिल एक उत्कृष्ट स्क्रब हो, जसले छालाको गहिरो सफा गर्छ। दूधमा मिसाएर पेस्ट तयार गर्नुहोस् र हल्का मसाज गर्दै टोनिङ भएको ठाउँमा लगाउनुहोस्। यसले मृत कोशिका हटाएर छालालाई कोमल बनाउँछ।

५. टमाटरको रस

टमाटरमा पाइने लाइकोपीनले सूर्यको किरणबाट हुने हानिबाट छालालाई जोगाउँछ। टमाटरको रस छालामा लगाउँदा चमक आउँछ र छाला मुलायम हुन्छ। टमाटरले अनुहारमा प्राकृतिक र ताजा लुक दिन्छ।

गर्मीको मौसममा छालालाई टोनिङ, कालोपन वा नीरसताबाट जोगाउन कृत्रिम क्रिमहरू प्रयोग गर्नुको सट्टा यी घरेलु उपायहरू अपनाउनुहोस्। यी सबै प्राकृतिक तत्वहरूले छालालाई पोषण दिन्छन् र दीर्घकालीन लाभ पनि प्रदान गर्छन्।