रुपन्देही । तिलोत्तमा नगरपालिका वडा नम्बर ९ मा गठित सिर्जनशील टोल विकास संस्थाको प्रथम साधारण सभा तथा प्रथम अधिवेशन सम्पन्न भएको छ ।
स्थानीय विकास प्रक्रियामा टोल तथा बस्ती स्तरबाट नागरिक सहभागिता सुनिश्चित गर्दै सामाजिक, सांस्कृतिक र आधारभूत आवश्यकताका क्षेत्रमा दिगोपना सृजना गर्ने उद्देश्यले संस्थाले अधिवेशन सम्पन्न गरेको हो ।
कार्यक्रमका प्रमुख अतिथि वडा सदस्य कमल रेग्मी र विशेष अतिथि वडा सदस्य लब्सन गुरुङसहित टोलवासीको व्यापक सहभागिता रहेको थियो । प्रमुख अतिथि रेग्मीले संस्थाले छोटो समयमा प्रभावकारी गतिविधि सञ्चालन गर्दै आएको भन्दै आगामी दिनमा थप सहकार्य गर्ने प्रतिबद्धता व्यक्त गरे ।
अधिवेशनका लागि डोल्मा थामिको संयोजनमा तीन सदस्यीय निर्वाचन मण्डल गठन गरिएको थियो । निर्वाचनबाट कृष्ण प्रसाद डुम्रे अध्यक्ष, सीता घिमिरे उपाध्यक्ष, राजेन्द्र पोखरेल सचिव, सिजन सिंजाली कोषाध्यक्षसहित ११ सदस्यीय नयाँ कार्यसमिति चयन गरिएको छ ।
नव–निर्वाचित अध्यक्ष डुम्रेका अनुसार संस्थाले समाजमा सुशासनलाई प्राथमिकता दिँदै सरसफाइ अभियान, सडक बत्ती व्यवस्थापन, सामाजिक सहिष्णुता प्रवर्द्धनलगायत गतिविधिहरूमा सक्रिय भूमिका निर्वाह गर्दै आएको छ ।
प्रतिक्रिया