सुनको मूल्यले बनायो नयाँ कीर्तिमान, कति पुग्यो तोलामा ?

काठमाडौं । अन्तरराष्ट्रिय बजारमा सुनको मूल्य बढेपछि त्यसको प्रभाव नेपाली बजारमा पनि देखिएको छ ।

सोमबारको तुलनामा मंगलबार सुनको मूल्य तोलामा २ हजार ३ सय रुपैयाँले वृद्धि भएको नेपाल सुनचाँदी व्यवसायी महासंघले जनाएको छ । महासंघका अनुसार सोमबार प्रतितोला २ लाख ३३ हजार १ सय रुपैयाँमा कारोबार भएको सुन मंगलबार बढेर २ लाख ३५ हजार ४ सय रुपैयाँमा पुगेको हो ।

यद्यपि, चाँदीको मूल्य स्थिर रहेको छ । सोमबार एक तोला चाँदी २ हजार ९६० रुपैयाँमै कारोबार भएको थियो । गत आइतबार सुनको मूल्य २ लाख ३० हजार ६ सय रुपैयाँमा झरेको थियो भने चाँदी त्यही दिन प्रतितोला २ हजार ९३० रुपैयाँमा कारोबार भएको थियो ।

यसैबीच, अन्तरराष्ट्रिय बजारमा मंगलबार एक औँस (ounce) सुनको मूल्य ३ हजार ९६५ अमेरिकी डलरसम्म पुगेको अन्तरराष्ट्रिय समाचार एजेन्सीहरूले जनाएका छन् ।

विशेषज्ञहरूका अनुसार हालको मूल्यवृद्धिमा विश्वव्यापी आर्थिक अनिश्चितता र अमेरिकी डलरको भाउमा आएको उतारचढावले पनि प्रभाव पारेको हो ।