सुनको मूल्यमा नयाँ रेकर्ड ! एकैदिन ७ हजार ६ सयले बढ्यो

काठमाडौं । दशैंँ बिदा सकिएसँगै नेपाली बजारमा सुनको मूल्यले ऐतिहासिक उचाइ छोएको छ ।

आजदेखि लागू भएको नयाँ दरअनुसार सुनको मूल्य एकैदिनमा ७ हजार ६ सय रुपैयाँले बढ्दै रेकर्ड कायम गरेको हो । सुनचाँदी व्यवसायी महासंघका अनुसार आज शुक्रबारको दरमा छापावाल सुन तोलाको २ लाख ३० हजार ६०० रुपैयाँ कायम गरिएको छ । यसअघि असोज १२ गते तोलाको २ लाख २३ हजार २०० रुपैयाँमा कारोबार भइरहेको सुन आजसम्मकै सबैभन्दा महँगो दरमा पुगेको हो ।

त्यस्तै, चाँदीको मूल्य पनि बढेको छ । आइतबार तोलाको २ हजार ८१० रुपैयाँमा रहेको चाँदी आज २ हजार ९३० रुपैयाँ पुगेको छ, जसमा १२० रुपैयाँको वृद्धि भएको हो ।

बजार विश्लेषकहरूका अनुसार अन्तर्राष्ट्रिय बजारमा सुनको मूल्य बढ्नु, अमेरिकी डलरको विनिमय दर उच्च हुनु र चाडपर्वका कारण आन्तरिक माग बढ्नु मूल्य वृद्धिका मुख्य कारण हुन् ।