काठमाडौं । एएफसी यू–२० महिला एसियन कप छनोट अन्तर्गत समूह ‘ए’ को अन्तिम खेलमा नेपालले उत्तर कोरियासँग ११–० को भारी हार बेहोरेको छ।
भुटानको थिम्पुस्थित चाङलिमिथाङ स्टेडियममा आइतबार भएको खेलमा बलियो प्रतिद्वन्द्वी उत्तर कोरियाले पहिलो हाफमै ५ गोल गर्दै स्पष्ट अग्रता बनाएको थियो। दोस्रो हाफमा थप ६ गोल गर्दै उत्तर कोरियाले आफ्नो जितलाई अझ सुदृढ बनायो।
यस जितसँगै उत्तर कोरियाले समूहका सबै तीन खेल जित्दै ९ अंक हासिल गर्यो र समूह विजेता बनेर अर्को वर्ष थाइल्याण्डमा हुने एसियन कपको अन्तिम चरणमा स्थान पक्का गर्यो। साविक विजेता समेत रहेको उत्तर कोरियाले छनोट चरणमा ३६ गोल गरेको छ र एक गोल पनि खानु परेन।
नेपालका लागि भने यो छनोटको पहिलो हार हो, तर यस हारसँगै अन्तिम चरणमा पुग्ने सम्भावना समाप्त भएको छ। नेपालले तीन खेलबाट ४ अंक मात्र जोड्न सफल भयो। पहिलो खेलमा भुटानसँग १–१ को बराबरी खेलेको नेपालले दोस्रो खेलमा साउदी अरेबियामाथि १–० को जित हासिल गरेको थियो।
नियम अनुसार ८ समूहका विजेता सिधै अन्तिम चरणमा पुग्नेछन्, भने उपविजेतामध्ये उत्कृष्ट ३ टोलीले पनि स्थान बनाउनेछन्। तर, अन्य समूहका दोस्रो स्थानमा रहेका टोलीसँग तुलना गर्दा नेपालको ४ अंक पर्याप्त भएन।
नेपालले प्रारम्भिक लक्ष्यमा भुटान र साउदीलाई हराउँदै उत्तर कोरियासँग बराबरी खेल्दै छनोट हुने आशा राखेपनि, त्यो सपना पूरा हुन सकेन।
प्रतिक्रिया