काठमाडौं । एएफसी २० वर्षमुनिको महिला एशियन कप छनोटमा नेपालले साउदी अरेबियामाथि रोमाञ्चक जित हात पारेको छ।
भुटानको चाङ्लिमिथाङ रंगशालामा शुक्रबार भएको खेलमा नेपालले अन्तिम मिनेटमा आएको गोलको आधारमा १–० को जीत दर्ता गर्यो। निर्णायक गोल खेलको ९०औं मिनेटमा शुक्रिया मियाँले गरिन्। यसअघि, ३६औं मिनेटमा प्राप्त पेनाल्टीको मौका सदुपयोग गर्न नेपाल असफल रह्यो। मीना देउवाको प्रहार बारमा ठोक्किएपछि अग्रता लिने मौका गुमेको थियो।
यसअघि समूहको पहिलो खेलमा नेपालले घरेलु टोली भुटानसँग १–१ गोलको बराबरी खेलेको थियो। अब समूह चरणको अन्तिम भिडन्तमा नेपालले आइतबार बलियो प्रतिद्वन्द्वी उत्तर कोरियासँग खेल्नेछ।
३२ राष्ट्र सहभागी रहेको यस छनोटमा आठ समूह बनाइएको छ। प्रत्येक समूहको विजेता र उत्कृष्ट तीन उपविजेता टोलीले २०२६ मा थाइल्यान्डमा हुने एएफसी २० वर्षमुनिको महिला एशियन कपमा स्थान पाउनेछन्।
प्रतिक्रिया