आर्थिक वर्षको पहिलो दिन सेयर बजारमा उत्साहजनक वृद्धि

काठमाडौं । आर्थिक वर्ष २०८२/८३ को पहिलो दिन तथा साता समाप्तिको बिहीबार सेयर बजारमा उल्लेखनीय सुधार देखिएको छ।

नेपाल स्टक एक्सचेन्ज (नेप्से) परिसूचक ७९.८२ अंकले उकालो लाग्दै २८७४.६० विन्दुमा पुग्न सफल भयो। आजको कारोबारमा कुल २३९ कम्पनीको सेयर मूल्यमा वृद्धि हुँदा ९ कम्पनीको मूल्यमा गिरावट आएको छ। दिनभरमा ३११ वटा स्क्रिप्टका ३ करोड कित्ता सेयर किनबेच हुँदै कूल १६ अर्ब ५९ करोड रुपैयाँ बराबरको कारोबार भएको छ।

दैनिक कारोबारको सूचीमा नेपाल रिइन्स्योरेन्स कम्पनी अग्रस्थानमा रह्यो, जहाँ ८४ करोड रुपैयाँभन्दा बढीको कारोबार भयो। यसैगरी, बुटवल पावर कम्पनीमा ६० करोड, राधी विद्युत कम्पनीमा ५६ करोड, सानिमा माइ हाइड्रोमा ४२ करोड र न्यादी ग्रुपमा ४१ करोड रुपैयाँको कारोबार देखियो।

आज ट्रेड टावर, शुभम पावर र थ्रिस्टार हाइड्रो कम्पनीको सेयर मूल्यमा सकारात्मक सर्किट लागेको छ, जसले बजारमा उछाल ल्याउन थप ऊर्जा प्रदान गर्‍यो। सेयर बजारमा आएको यो उछालमा ‘अन्य समूह’ को उल्लेखनीय भूमिका देखिएको छ, जुन समूह ५.०९ प्रतिशतले बढ्यो।

हाइड्रोपावर, इन्भेष्टमेन्ट र जीवन बीमा समूह पनि क्रमशः ३ प्रतिशतभन्दा बढीले उकालो लागे। यता, म्युचुअल फन्ड समूहमा भने न्यूनतम ०.०४ प्रतिशत मात्रको वृद्धिदर रह्यो।