८ दिनपछि खुल्यो सुनचाँदी बजार, आज कतिमा हुँदैछ कारोबार ?

काठमाडौं । नेपाल सुनचाँदी व्यवसायी महासंघले ८ दिनपछि सुन र चाँदीको मूल्य निर्धारण गरेको छ।

विलासिता करको विरोधमा जारी आन्दोलनका कारण असार १९ गतेदेखि मूल्य नतोकीएको महासंघले शुक्रबारबाट नयाँ मूल्य सूची सार्वजनिक गरेको हो। महासंघका अनुसार, शुक्रबार छापावाल सुनको मूल्य तोलामा १ लाख ९१ हजार ८०० रुपैयाँ कायम गरिएको छ। अघिल्लो मूल्य निर्धारण भएको असार १९ मा यो १ लाख ९२ हजार १०० रुपैयाँ थियो। अर्थात्, आज सुनको मूल्य ३०० रुपैयाँले घटेको हो।

त्यस्तै, चाँदीको मूल्य भने तोलामा २ हजार २२० रुपैयाँ पुगेको छ, जुन असार १९ मा २ हजार १७० रुपैयाँ थियो। यस अनुसार चाँदीको मूल्य ५० रुपैयाँले बढेको हो।

सरकारसँग सहमति भएपछि आन्दोलन अन्त्य

विलासिता करको विरोधमा व्यवसाय बन्द गरेर आन्दोलनमा उत्रिएका सुनचाँदी व्यवसायीहरू बिहीबार सरकारले राखेको वार्तापछि आफ्नो व्यवसायमा फर्किएका छन्। अर्थ मन्त्रालयमा सम्पन्न वार्ताबाट ६ बुँदे सहमति भएपछि आन्दोलन स्थगन गरिएको हो।

सम्झौताअनुसार, विलासिताको परिभाषाभित्र राखिएको सुन तथा गरगहनाको विषयमा अध्ययन गरी पुनरावलोकन गर्न सिफारिस गरिनेछ। यसका लागि अर्थ मन्त्रालयका राजस्व व्यवस्थापन महाशाखा प्रमुखको संयोजकत्वमा कार्यदल गठन गरिनेछ। कार्यदलमा उद्योग, वाणिज्य तथा आपूर्ति मन्त्रालय, आन्तरिक राजस्व विभाग, भन्सार विभाग, नेपाल राष्ट्र बैंक, महासंघ र सम्बन्धित समितिका पदाधिकारीहरू रहनेछन्।

कार्यदलको सचिवालय अर्थ मन्त्रालयकै राजस्व व्यवस्थापन महाशाखामा रहने सहमति भएको छ।