यू-१६ इस्ट जोन कप: उपाधि जित्न नेपाललाई ११४ रनको लक्ष्य

काठमाडौं । एसीसी यू-१६ इस्ट जोन कप क्रिकेटको उपाधिका लागि भइरहेको फाइनल खेलमा नेपालले सिंगापुरलाई न्यून लक्ष्यमा रोक्न सफल भएको छ ।

टस जितेर पहिले ब्याटिङ गरेको सिंगापुर ४०.५ ओभरमा जम्मा ११३ रनमै अलआउट भएको हो । अब नेपाललाई उपाधि जित्न ११४ रन मात्र आवश्यक छ । सिंगापुरका लागि सबैभन्दा धेरै रन रोहन अस्टिनले बनाएका हुन् । उनले निकै धीमी तर टिकाउ पारी खेले– करिब ९० बल खेल्दै २३ रन जोडे । रिहान नाइकले १५ रनको योगदान दिए ।

नेपालका लागि बलिङतर्फ अभय यादव चम्किए । उनले १० ओभरमा ३४ रन खर्चिँदै ३ विकेट लिए । सुशिल बहादुर रावलले पनि ३ विकेट हात पारे । शुभम खनालले २ तथा कप्तान बिपिन प्रसाद शर्माले १ विकेट लिए । नेपाल यस प्रतियोगितामा हालसम्म अपराजित रहँदै आएको छ । समूह चरणमा सिंगापुरलाई हराएको नेपालले सेमिफाइनलमा मलेसियालाई पराजित गरेको थियो । सिंगापुर भने नेपालसँग हार व्यहोरेपछि बाँकी सबै खेल जित्दै फाइनल पुगेको हो ।

आजै तेस्रो स्थानका लागि मलेसिया र हङकङबीच प्रतिस्पर्धा हुँदैछ । साविक विजेता नेपाल यो संस्करणमा पनि अपराजित यात्रा कायम राख्दै उपाधि रक्षा गर्ने रणनीतिमा छ ।