एसीसी यू-१६ इस्ट जोन कप: मलेसियालाई हराउँदै नेपाल फाइनलमा

काठमाडौं । नेपालले एसीसी यू-१६ इस्ट जोन कप क्रिकेट प्रतियोगिताको फाइनल यात्रा तय गरेको छ ।

बिहीबार सम्पन्न सेमिफाइनल खेलमा मलेसियालाई ९ विकेटले पराजित गर्दै नेपाल उपाधि नजिक पुगेको हो । पहिले ब्याटिङको मौका पाएको मलेसियाले नेपाली बलरहरूको धारिलो प्रदर्शनका कारण ४३.१ ओभरमा जम्मा ९० रनमै अलआउट भयो । मलेसियाका मुहम्मद फातुल मुइनले ३८ रनको योगदान दिएका थिए भने कप्तान दियाज पात्रोले १० रन जोडे ।

बाँकी ब्याट्सम्यानले दोहोरो अंकमा रन बनाउन सकेनन् । नेपालका तर्फबाट अभय यादवले उत्कृष्ट प्रदर्शन गर्दै १० ओभरमा १५ रन खर्चिएर ४ विकेट लिएका थिए । सुभम खनालले पनि १० ओभरमा ४ मेडन राख्दै १२ रनमा ३ विकेट झारे । कप्तान विपिन प्रसाद शर्मा र सचिन भट्टले समान १-१ विकेट लिए ।

९१ रनको लक्ष्य पछ्याएको नेपालले ११.४ ओभरमै लक्ष्य भेट्टायो । परिमार्जन यादवले आक्रामक अर्धशतक प्रहार गर्दै ३५ बलमा अविजित ५९ रन बनाए भने शिवांश बजगाइले नटआउट २३ रनको योगदान दिए ।

अब नेपालले उपाधिका लागि हङकङ र सिंगापुरबीचको विजेता टिमसँग प्रतिस्पर्धा गर्नेछ । प्रतियोगितामा देखिएको नेपालको बलिङ तथा ब्याटिङ प्रदर्शनले उपाधिको बलियो दावेदारको रूपमा स्थापित गराएको छ ।