दुम्कीवासको वैकल्पिक मार्गसमेत अवरुद्ध , पूर्व–पश्चिम यातायात पूर्ण रूपमा ठप्प

काठमाडौं । बुटवल–नारायणगढ सडकखण्डअन्तर्गत नवलपरासी (बर्दघाट सुस्तापूर्व) क्षेत्रको दुम्कीवासमा वैकल्पिक रूपमा सञ्चालन हुँदै आएको सडकसमेत पूर्ण रूपमा अवरुद्ध भएको छ।

विनयी त्रिवेणी गाउँपालिका–१ मा रहेको दुम्कीवास पुल भाँचिएपछि अस्थायी डाइभर्सनमार्फत सवारी आवतजावत हुँदै आएको थियो। तर हालैको अविरल वर्षाले उक्त डाइभर्सन पनि बगाएपछि अर्को वैकल्पिक भित्री मार्ग प्रयोग गरिंदै आएको थियो। तर सोमबार बिहानदेखि त्यो मार्गसमेत अवरुद्ध भएको जिल्ला प्रहरी कार्यालयका प्रहरी उपरीक्षक यादव ढकालले जानकारी दिए।

ढकालका अनुसार विनयी त्रिवेणी–३ स्थित खरङ्गे खोलामा वर्षापछि अत्यधिक बहाव बढ्दा वैकल्पिक मार्गसमेत प्रयोग गर्न नसकिने स्थिति बनेको हो। अहिले दुम्कीवास–दाउन्ने सडकखण्डमा सवारीसाधनको सञ्चालन पूर्ण रूपमा ठप्प भएको छ। पूर्वपश्चिम राजमार्ग अन्तर्गत विनयी खोलामा बनाइएको अस्थायी डाइभर्सन बगाएपछि साना तथा मध्यम (१२ चक्केसम्म) सवारीसाधनलाई वैकल्पिक मार्ग—होङ्सी गेट, सर्दी र ज्यामिरे हुँदै आवतजावत गराइएको थियो।

तर सो मार्ग पनि वर्षाले भत्किएपछि सम्पूर्ण यातायात अवरुद्ध बनेको हो। नदी तथा खोलामा आएको बहावसँगै अस्थायी डाइभर्सनहरूमा भरपर्दो संरचना नहुँदा यात्रुहरू बिचल्लीमा परेका छन्।

स्थानीय प्रशासन र सुरक्षा निकायले अवस्थाको अनुगमन गरिरहेको भए पनि तत्काल समस्या समाधान हुने सम्भावना देखिएको छैन।