चन्द्रपुरमा बस दुर्घटना, १० यात्रु घाइते

रौतहट । रौतहटको चन्द्रपुर नगरपालिका–२ मा सोमबार बिहान भएको बस दुर्घटनामा १० यात्रु घाइते भएका छन्।

घाइतेमध्ये तीन जना नेपाली तथा सात जना भारतीय नागरिक रहेको जिल्ला ट्राफिक प्रहरी कार्यालय, रौतहटले जनाएको छ। काठमाडौँबाट महोत्तरीको भिट्ठामोडतर्फ जाँदै गरेको बा.प्र.०१–००६ ख ५२१६ नम्बरको यात्रुबाहक बस पूर्व–पश्चिम राजमार्गमा अनियन्त्रित भई दुर्घटनामा परेको हो।

इलाका प्रहरी कार्यालय चन्द्रनिगाहपुर र ट्राफिक प्रहरीको संयुक्त टोलीले तत्काल घटनास्थलमा पुगेर घाइतेहरूको उद्धार गरेको थियो। घाइतेहरूलाई चन्द्रपुरस्थित चपुर अस्पतालमा उपचारका लागि भर्ना गरिएको छ, जहाँ उनीहरूको अवस्था सामान्य रहेको बताइएको छ।

दुर्घटनापछि बसका चालक फरार रहेका छन् भने उनको खोजी कार्य जारी रहेको प्रहरीले जानकारी दिएको छ।