काठमाडौं । स्कटल्याण्डमा जारी त्रिदेशीय टी–२० अन्तर्राष्ट्रिय शृङ्खलामा नेपालले घरेलु टोली स्कटल्याण्डविरुद्ध रोमाञ्चक जित हात पारेको छ।
स्कटल्याण्डले प्रस्तुत गरेको ९८ रनको लक्ष्य नेपालले १९ ओभर ५ बलमा ८ विकेट गुमाउँदै पूरा गर्यो। नेपालका ओपनर कुशल भुर्तेलले ३० रनको महत्वपूर्ण योगदान दिए। उनले ३५ बलमा ४ चौका प्रहार गर्दै टोलीको आधार तयार गरे। बाँकी ब्याटरहरू खासै लामो समय टिक्न नसके पनि टिमले लक्ष्य पुरा गर्न सफल भयो।
अन्य ब्याट्सम्यानहरूमध्ये दीपेन्द्रसिंह ऐरीले १४, बसिर अहमदले १३, र किरण ठगुन्नाले १० रन बनाए। सन्दीप लामिछाने (१ रन) र करण केसी (३ रन) अविजित रहेर टिमलाई जितसम्म पुर्याए। स्कटल्याण्डका बलरमध्ये माइकल लिस्क र सफायान सरिफले समान दुई–दुई विकेट लिए।
यसअघि टस जितेर पहिले ब्याटिङ गरेको स्कटल्याण्डले १९ ओभर ४ बलमा ९७ रनमा सीमित भयो। माइकल लिस्कबाहेक अन्य ब्याटर नेपाली बलिङको सामना गर्न असफल रहे। लिस्कले एक्लैले ४७ रनको लडाकु इनिङ खेले।
नेपालका लागि सन्दीप लामिछानेले घातक प्रदर्शन गरे। उनले ४ ओभरमा मात्र ११ रन खर्चेर ४ विकेट झारे। करण केसी र दीपेन्द्रसिंह ऐरीले २–२ विकेट लिए भने ललित राजवंशीले एक विकेट हात पारे।
अब नेपालले शृङ्खलाको तेस्रो खेल नेदरल्यान्ड्ससँग बिहीबार खेल्नेछ।
प्रतिक्रिया