काठमाडौं । ललितपुरको ग्वार्कोमा निर्माणाधीन फ्लाईओभर अब चार दिनपछि पूर्ण रूपमा सञ्चालनमा आउने भएको छ।
मुख्य संरचनाको निर्माण कार्य सकिएसँगै सवारीसाधन सञ्चालनको अन्तिम तयारी तीव्र गतिमा अगाडि बढाइएको छ। फ्लाईओभरको औपचारिक उद्घाटन असार ६ गते प्रधानमन्त्री केपी शर्मा ओलीको प्रमुख आतिथ्यतामा हुने तय भएको छ। उद्घाटन समारोहपछि उक्त फ्लाईओभर सवारीका लागि खुला गरिनेछ।
गत शनिबार भौतिक पूर्वाधार तथा यातायात मन्त्री देवेन्द्र दाहालले सडक विभागको प्राविधिक टोलीसहित फ्लाईओभरको स्थलगत निरीक्षण गरेका थिए। निरीक्षणपछि उनले छिटोभन्दा छिटो सवारी सञ्चालनको व्यवस्था मिलाउन निर्देशन दिएका थिए। सडक विभागअन्तर्गत गुणस्तर अनुसन्धान तथा विकास केन्द्रका प्रमुख दीप बाराहीका अनुसार, फ्लाईओभरको मुख्य संरचना पूरा भइसकेको छ।
अब लेन सेपरेटर राख्ने, पेन्टमार्फत लाइनिङ गर्नेजस्ता अन्तिम तयारीका कामहरू सम्पन्न भएपछि फ्लाईओभर सवारीका लागि पूर्ण रूपमा तयार भएको छ। फ्लाईओभर सञ्चालनमा आएपछि ग्वार्को क्षेत्रमा बढ्दो ट्राफिक जाम न्यूनीकरणमा टेवा पुग्ने विश्वास गरिएको छ।
प्रतिक्रिया