काठमाडौं । विश्वकप क्रिकेट लिग २ अन्तर्गत जारी शृङ्खलामा नेपालले आजको अन्तिम खेलमा नेदरल्यान्ड्सविरुद्ध पहिले ब्याटिङ गर्ने भएको छ।
स्कटल्यान्डमा मंगलबार भइरहेको खेलमा डच टिमले टस जितेर नेपाललाई ब्याटिङको निम्तो दिएको हो। आजको खेलका लागि नेपाली टिममा केही परिवर्तन गरिएको छ। अनुभवी खेलाडी गुलशन झा र सोमपाल कामीलाई विश्राम दिँदै अनिल साह र नन्दन यादवलाई प्लेइङ-११ मा स्थान दिइएको नेपाल क्रिकेट संघले जनाएको छ।
यसअघि भएको खेलमा नेपालले नेदरल्यान्ड्सलाई पराजित गरेको थियो। हालसम्म शृङ्खलामा नेपालले खेलेका ३ खेलमध्ये २ मा विजय हासिल गरेको छ भने १ खेलमा पराजय भोगेको छ।
यो खेल नेपालको शृङ्खलाको अन्तिम खेल हो र जित निकाल्दै प्रतियोगिता समाप्त गर्ने लक्ष्यमा रहेको छ।
प्रतिक्रिया