काठमाडौं । हिजो सामान्य रूपमा बढेको शेयर बजारले आज दोहोरो अङ्कको वृद्धि गरेको छ।
नेप्से परिसूचक आज १७.४४ अङ्कले उकालो लाग्दै २,६९३.०६ विन्दुमा पुगेको छ। आजको बजारमा बीमा, माइक्रोफाइनान्स र ‘अन्य’ समूह बाहेकका सबै क्षेत्रको शेयरमा हरियाली देखिएको छ। विशेषगरी, बैंकिङ समूहको शेयर मूल्य १.८८ प्रतिशतले र विकास बैंक समूहको शेयर १.२९ प्रतिशतले बढेको छ।
ओम मेगाश्री फर्मास्युटिकल्स र प्योर इनर्जी कम्पनीको शेयर आज १० प्रतिशतले उक्लिएर सर्किट हानेको छ। तर समग्र बजार बढेको अवस्थामा पनि बाराही हाइड्रोपावर कम्पनीको शेयरमा ५ प्रतिशतभन्दा बढीको गिरावट आएको छ। बजारसँगै कारोबार रकम पनि उल्लेख्य रूपमा बढेको छ। हिजो ६ अर्ब ५२ करोड रुपैयाँको कारोबार भएकोमा आज ३२३ वटा कम्पनीका २ करोड ७ लाख कित्ता शेयर किनबेच हुँदै कारोबार रकम ८ अर्ब ५८ करोड रुपैयाँमा पुगेको छ।
शेयर बजारमा देखिएको यो सकारात्मक गति लगानीकर्ताका लागि उत्साहवर्धक संकेतको रूपमा हेरिएको छ।
प्रतिक्रिया