काठमाडौं । लगातार ६ दिनसम्म गिरावट आएको सेयर बजारमा आज सुधार देखिएको छ।
सोमबार बजार परिसूचक (नेप्से) २२.९९ अंकले वृद्धि भई २६३२.०९ विन्दुमा पुगेको हो। आजको सेयर कारोबार रकम ७ अर्ब ३५ करोड रुपैयाँभन्दा बढी पुगेको छ। कुल १८५ कम्पनीको शेयर मूल्य बढ्दा, ६० कम्पनीको घटेको र २ कम्पनीको स्थिर रहेको देखिन्छ। आज विशेषगरी ठूला कम्पनीहरुको कारोबार मापन गर्ने सेन्सेटिभ इन्डेक्समा उल्लेखनीय वृद्धि देखिएको छ। समूहगत सूचकतर्फ हेर्दा होटल तथा पर्यटन समूहबाहेक अन्य सबै सूचकहरू सकारात्मक भएका छन्।
सबैभन्दा धेरै वृद्धि आव विकास बैंक समूहमा देखिएको छ, जसको सूचक २.०१ प्रतिशतले बढेको हो। त्यसैगरी बैंकिङ, जलविद्युत्, निर्जीवन बीमा र ट्रेडिङ समूहमा पनि १ प्रतिशतभन्दा बढीको वृद्धि भएको छ। आज पाँचवटा कम्पनीका सेयरमा सकारात्मक सर्किट लागेको छ। ती कम्पनीहरूमा सप्तकोशी डेभलपमेन्ट बैंक, ओम मेगा फर्मास्युटिकल्स, कर्पोरेट डेभलपमेन्ट बैंक, सिन्धु विकास बैंक र तेह्रथुम पावर कम्पनी परेका छन्।
यता, विन नेपाल लघुवित्तको शेयरमा भने नकारात्मक सर्किट लागेको छ। कारोबारको दृष्टिले राधी जलविद्युत् कम्पनी अगाडि देखिएको छ भने क्रेष्ट माइक्रो इन्स्योरन्स कम्पनीको शेयर सबैभन्दा धेरैपटक किनबेच भएको हो। कारोबार संख्याको आधारमा हिमालयन ८०–२० म्युचुअल फण्ड शीर्षमा रह्यो।
सेयर बजारमा केही दिनदेखिको निरन्तर गिरावटपछि आएको आजको सुधार लगानीकर्ताका लागि आशाको संकेत मानिएको छ।
प्रतिक्रिया