काठमाडौं । काभ्रेको माप्तीस्थित रोशी खोलामा आएको बाढीले बीपी राजमार्गको डाइभर्सन बगाएपछि आठ घण्टादेखि यातायात अवरुद्ध भएको छ।
सोमबार रातिदेखि रोकिएको सवारी आवागमन खुलाउन प्रहरी तथा स्थानीय टोलीले प्रयास गरिरहेका छन्। जिल्ला प्रहरी कार्यालय काभ्रेका अनुसार रोशी गाउँपालिका–१२ मा रहेको राजमार्गको मङ्गलटारतर्फको सडक खण्डमा थप क्षति भएपछि अझै पूर्णरूपमा सडक खुलाउन सकिएको छैन। हाल एकतर्फी सवारी सञ्चालनका लागि प्रयास भइरहेको छ।
गत वर्षको असोजमा बाढीले क्षति पुर्याएपछि अस्थायी रूपमा डाइभर्सन बनाइएको थियो। अहिलेको बाढीले त्यही डाइभर्सन फेरि बगाएको हो। राजमार्गमा अलपत्र परेका १७ यात्रुको सफलतापूर्वक उद्धार गरिएको प्रहरीले जनाएको छ। यसैबीच, सोमबार साँझ पनौती नगरपालिका–५ सुब्बागाउँकी ३३ वर्षीया रेनुका गिरी खोलाको बाढीले बगाएपछि बेपत्ता भएकी छिन्।
मेला फर्कने क्रममा अचानक आएको बाढीले उनलाई बगाएको जनाइएको छ। सोमबार रातिसम्म खोजी कार्य सम्भव नभएपछि आज बिहानैदेखि नेपाल प्रहरी, नेपाली सेना, सशस्त्र प्रहरी र स्थानीयको टोलीले पुनः खोजी कार्य प्रारम्भ गरेको प्रनाउ घलेले जानकारी दिए।
अविरल वर्षाले पनौती बसपार्क आसपासका क्षेत्रहरू डुबानमा परेका छन् भने बाढीले आलु खेतीमा समेत क्षति पुर्याएको छ। स्थानीय प्रशासनले थप क्षतिको मूल्याङ्कन कार्य सुरु गरिसकेको छ।
प्रतिक्रिया