गुल्मी । यात्रुको चाप बढेसँगै गुल्मीको रेसुङ्गा विमानस्थलबाट अब हप्तामा तीन दिन नियमित उडान हुने भएको छ।
यसअघि साप्ताहिक रूपमा मात्र सञ्चालन हुँदै आएको उडान अब आइतबार, मङ्गलबार र बिहीबार गरी हप्तामा तीन दिन हुने रेसुङ्गा विमानस्थलका स्टेशन प्रमुख सुमन थापाले जानकारी दिए। नेपाल एयरलाइन्सको टुइनेटर विमानमार्फत सेवा सञ्चालन हुँदै आएको छ। जहाज मर्मतका कारण केही समय सेवा अवरुद्ध भए पनि अहिले पुनः नियमित रूपमा उडान सुरु भएको हो।
मौसमका कारण र जहाजको अभावले नियमितता कायम राख्न कठिनाइ हुँदै आएको थियो। निगमको १८ सिट क्षमताको विमान बिहान ६ः१० बजे काठमाडौंबाट रेसुङ्गातर्फ उड्नेछ भने बिहान ७ः१५ बजे रेसुङ्गाबाट काठमाडौंका लागि प्रस्थान गर्ने तालिका तय गरिएको छ। उडान नियमित हुने भएपछि स्थानीयवासीहरूमा उत्साह देखिएको छ।
भाडादरको हिसाबले रेसुङ्गाबाट काठमाडौंका लागि रु ७,०८० र काठमाडौंबाट रेसुङ्गा आउने यात्राका लागि रु ७,२८० तोकिएको छ।
प्रतिक्रिया