एकैदिन तोलामा ६ सयले बढ्यो सुनको मूल्य! आज कति पुग्यो ?

काठमाडौं । अन्तर्राष्ट्रिय बजारमा सुनको मूल्यमा भएको सामान्य वृद्धिको असर नेपाली बजारमा पनि देखिएको छ। नेपाल सुनचाँदी व्यवसायी महासङ्घका अनुसार आज (बिहीबार) सुनको मूल्य तोलामा ६ सय रुपैयाँले बढेको छ।

बिहीबार एक तोला छापावाला सुनको मूल्य १ लाख ९२ हजार २ सय रुपैयाँ कायम गरिएको महासङ्घले जनाएको छ। अघिल्लो दिन अर्थात् बुधबार यसको मूल्य १ लाख ९१ हजार ६ सय रुपैयाँ रहेको थियो।

यस्तै, आज चाँदीको मूल्य भने केही घटेर १ हजार ९५५ रुपैयाँमा झरेको छ। बुधबार प्रतितोला चाँदी १ हजार ९६५ रुपैयाँमा कारोबार भएको थियो।

अन्तर्राष्ट्रिय बजारमा सुनको उच्च मूल्य स्थिर

अन्तर्राष्ट्रिय सञ्चार माध्यमहरूका अनुसार, आज अन्तर्राष्ट्रिय बजारमा सुनको मूल्य प्रति औँस ३ हजार ३९५ अमेरिकी डलरमा कारोबार भइरहेको छ। पछिल्लो समय अमेरिकी मुद्रास्फीति, आर्थिक अनिश्चितता र भू-राजनीतिक तनावका कारण लगानीकर्ताहरू सुनतर्फ आकर्षित भइरहेका छन्, जसको प्रत्यक्ष असर स्थानीय बजारमा पनि देखिएको हो।

नेपालमा सुनको मूल्य आयातमा निर्भर हुने भएकाले अन्तर्राष्ट्रिय बजारमा आएको सानो उतारचढावले पनि तत्काल असर पार्ने गर्दछ।