काठमाडौं । नागढुंगा–नौबिसे सडकअन्तर्गत पिप्लामोड खण्ड आगामी दस दिनका लागि आंशिक रुपमा बन्द गरिने भएको छ।
आज रातिदेखि लागू हुने यो व्यवस्था अनुसार प्रत्येक राति ११ बजेदेखि बिहान ३ बजेसम्म सडक पूर्ण रूपमा बन्द रहनेछ। नागढुंगा–मुग्लिन सडकको पूर्वी खण्डका प्रमुख इन्जिनियर केशवप्रसाद ओझाका अनुसार वैशाख ३१ गतेसम्म सडक सुधारको कामलाई तीव्रता दिने उद्देश्यले यस्तो कदम चालिएको हो।
हाल १ दशमलव ८ किलोमिटर क्षेत्रमा सडक स्तरोन्नति भइरहेको छ, जसअन्तर्गत पुरानो कालेपत्रे पूर्ण रूपमा हटाइनेछ। कामको प्रकृतिलाई ध्यानमा राख्दै रातिको समयमा अत्यावश्यक बाहेक अन्य सवारी साधन सञ्चालनमा रोक लगाइएको हो। सडक सुधार परियोजनाअन्तर्गत नागढुंगादेखि मुग्लिनसम्मको मार्गलाई तीन खण्डमा विभाजन गरी चरणबद्ध रूपमा निर्माण कार्य अघि बढाइएको छ।
यो मार्ग दैनिक १० हजारभन्दा बढी सवारीसाधनको आवागमन हुने व्यस्त सडक हो, जसका कारण वैकल्पिक मार्गको प्रयोग गर्न सर्वसाधारणलाई आग्रह गरिएको छ। योजना अनुसार तोकिएको समय सीमामा काम सम्पन्न गर्न सहयोग पुर्याउन आम सर्वसाधारण, चालक तथा यात्रुहरूलाई पूर्वसूचना दिइएको जनाइएको छ।
प्रतिक्रिया