हेटौंडा । निरन्तर वर्षाका कारण बगुवा खण्डमा बागमती खोलामा बनाइएको डाइभर्सन बगाउँदा हेटौंडा–काठमाडौँ जोड्ने कान्ति लोकपथ पूर्ण रूपमा अवरुद्ध भएको छ।
जिल्ला प्रहरी कार्यालय मकवानपुरका अनुसार आइतबार बिहानदेखिको अविरल वर्षाले मकवानपुर र ललितपुरको सिमानामा पर्ने बागमती खोलाको तटबन्धमा क्षति पु¥याएको छ। डाइभर्सन बगाएपछि सवारी आवागमन पूर्ण रूपमा रोकिएको हो। यसअघि पनि सो सडक वैशाख १८ गतेदेखि जेठ १ गतेसम्म दैनिक ६ घण्टा बन्द गरिँदै आएको थियो।
मकवानपुरतर्फको गंगटे क्षेत्रमा सडक विस्तार तथा भिर कटानको काम भइरहेकाले बिहान १० बजेदेखि दिउँसो ४ बजेसम्म सवारी निषेध गरिएको थियो। प्रहरीका अनुसार सडक खुलाउने प्रयास जारी भए पनि केही समय लाग्न सक्नेछ।
हाललाई काठमाडौँ–हेटौंडा यात्रा गर्नुपर्ने यात्रुहरूलाई वैकल्पिक मार्ग प्रयोग गर्न आग्रह गरिएको छ।
प्रतिक्रिया