आन्दोलनरत शिक्षकसँग संवादको ढोका खोल्दै सरकार

काठमाडौं । आन्दोलनरत शिक्षकहरूलाई वार्ताका लागि सरकारले पुनः आह्वान गरेको छ।

शिक्षा, विज्ञान तथा प्रविधि मन्त्रालयले एक विज्ञप्तिमार्फत शिक्षकहरूको मागलाई सम्बोधन गर्न संवादको बाटो रोज्न आग्रह गरेको हो। नवनियुक्त शिक्षामन्त्री रघुजी पन्तले जिम्मेवारी सम्हालेपछि पहिलोपटक आन्दोलनरत पक्षसँग वार्ता गर्न आग्रह गर्दै समसामयिक संकट समाधान गर्न तयार रहेको संकेत दिएका छन् ।

शिक्षा सचिव दीपक काफ्लेले शुक्रबार जारी गरेको विज्ञप्तिमा शिक्षकहरूको आन्दोलनप्रति मन्त्रालय गम्भीर रहेको र समस्याको समाधान संवादबाट खोज्न सकिने उल्लेख गरिएको छ। गत चैत २० गतेदेखि जारी शिक्षकहरूको आन्दोलन विद्यालय शिक्षा विधेयकसँग जोडिएको छ। उक्त विधेयक संसदमा पेस हुने, छलफल हुने र पारित हुने निश्चित प्रक्रिया अन्तर्गत अगाडि बढ्ने मन्त्रालयको भनाइ छ।

मन्त्रालयले नेपाल शिक्षक महासङ्घलाई वार्तामा सहभागी भई मिलेर समाधानको बाटो खोज्न अनुरोध गरेको छ। यसैबीच, आन्दोलन चर्कंदै जाँदा तत्कालीन शिक्षामन्त्री विद्या भट्टराईले राजीनामा दिएकी थिइन्। त्यसपछि मन्त्रीको जिम्मेवारी सम्हाल्नुभएका रघुजी पन्तले वार्ता र संवादबाट शिक्षामैत्री वातावरण बनाउने प्रतिबद्धता व्यक्त गरेका छन् ।

सरकारको पछिल्लो आग्रहले शिक्षक आन्दोलनको निकासको लागि नयाँ आशा पलाएको देखिन्छ।