काठमाडौं । नेपाल राष्ट्र बैंकका कार्यकारी निर्देशक डा. गुणाकर भट्टले गभर्नर नियुक्ति सुनिश्चित भएपछि शुक्रबार पदबाट राजीनामा दिएका छन्।
बुधबार साँझ प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच भएको बैठकमा डा.भट्टलाई राष्ट्र बैंकको १८औँ गभर्नर बनाउने सहमति भएको थियो। देउवाले सुरु देखिनै भट्टको नाममा जोड दिँदै आएका थिए भने प्रधानमन्त्री ओलीले पनि बुधबार उनलाई बोलाएर प्रत्यक्ष छलफल गरेका थिए।
अर्थशास्त्रमा विद्यावारिधि हासिल गरेका भट्ट गभर्नरको दौडमा रहेका अन्य पाँच प्रतिस्पर्धीलाई पछि पार्दै नियुक्तिका लागि अगाडि आएका हुन्। शुक्रबार नै अर्थमन्त्री विष्णु पौडेलको संयोजकत्वमा रहेको सिफारिस समितिले डा. भट्टसहित तीन जनाको नाम गभर्नर पदका लागि सिफारिस गर्ने तयारी गरेको छ।
सोही दिन मन्त्रिपरिषद्को बैठक बस्ने र भट्टलाई गभर्नरमा नियुक्त गर्ने योजना रहेको स्रोतले जनाएको छ।
प्रतिक्रिया