काठमाडौं । आईसीसी यू–१९ विश्वकप एसिया छनोट प्रतियोगिताअन्तर्गत नेपालले युएईविरुद्ध २०१ रनको प्रतिस्पर्धात्मक लक्ष्य प्रस्तुत गरेको छ।
मुलपानी क्रिकेट मैदानमा वर्षाका कारण ढिला सुरु भएको खेल ४० ओभरमा छोट्याइएको थियो। टस जितेर पहिला ब्याटिङ गरेको नेपालले ४० ओभरमा ९ विकेट गुमाएर २०० रन बनायो। नेपाली युवा टोलीका लागि कप्तान नरेन भट्टले उत्कृष्ट अर्धशतकीय इनिङ खेले। उनले ७५ बलमा ६७ रनको योगदान दिए।
नरेनसँगै दिलसाद अलीले ३४ रन बनाए भने साहिल पटेलले ३२ रन जोडे। अन्य ब्याटरहरूबाट अपेक्षाकृत ठुलो योगदान नआए पनि नेपालले सम्मानजनक योगफल तयार गर्न सफल भयो। युएईका लागि उदिस सुरीले उत्कृष्ट बलिङ गर्दै ३ विकेट लिए। उनको बलिङले नेपाललाई दबाबमा राख्न भूमिका खेले पनि कप्तान नरेनको संयमित प्रदर्शनले टोलीलाई दोहोरो शतक पार गरायो।
अब युएईलाई जित्नका लागि २०१ रनको लक्ष्य छ, जसका लागि नेपाली बलरहरूले प्रारम्भदेखि नै आक्रामक प्रदर्शन गर्नुपर्नेछ।
प्रतिक्रिया