साता सुरूमै सेयर बजारमा ३२ अंकको गिरावट, ५ अर्बको कारोबार

काठमाडौं । साताको पहिलो कारोबारको दिन सोमबार सेयर बजार परिसूचक (नेप्से) मा भारी गिरावट आएको छ ।

आज नेप्से ३२ दशमलव ३५ अंकले घट्दै २६७० दशमलव ९४ मा पुगेको छ । बजार खुलेको केही समय सामान्य वृद्धि देखिए पनि अन्त्यसम्म आइपुग्दा तीव्र गिरावट आएको हो। सोमबार २२१ वटा कम्पनीको सेयर मूल्य घट्दा लगानीकर्ताले ठूलो नोक्सानी व्यहोर्नुपर्‍यो। यद्यपि बजार समग्रमा ओरालो लागे पनि २३ कम्पनीका लगानीकर्ताले भने मुनाफा कमाए।

आत्मनिर्भर लघुवित्त वित्तीय संस्थाको सेयर मूल्य प्रतिकित्ता ६० रुपैयाँले उकालो लागेर सबैभन्दा धेरै वृद्धि भएको हो। यो दिन कुल ५ अर्ब ६५ करोड रुपैयाँ बराबरको कारोबार सम्पन्न भएको नेपाल स्टक एक्सचेञ्जले जनाएको छ।