पर्सा । वीरगञ्ज सुक्खा बन्दरगाह इन्ल्यान्ड क्लियरेन्स डिपो को सञ्चालन तथा व्यवस्थापनको जिम्मेवारी पुनः भारतीय कम्पनी प्रिस्टिन मेगा लजिष्टिक पार्क प्रालि लाई दिइएको छ।
नेपाल इन्टरमोडल यातायात विकास समितिका कार्यकारी निर्देशक आशिष गजुरेलका अनुसार, आगामी पाँच वर्षका लागि चार अर्ब ७१ करोड रुपैयाँको ठेक्का सम्झौतासहित प्रिस्टिन मेगा लजिष्टिक पार्क प्रालि छनोट भएको हो। समितिले सञ्चालन व्यवस्थापनका लागि आह्वान गरेको बोलपत्र प्रक्रियामा कन्टेनर कर्पोरेसन अफ इन्डिया लिमिटेड र प्रिस्टिन मेगा लजिष्टिक पार्क प्रालि प्रतिस्पर्धामा रहेका थिए।
कन्टेनर कर्पोरेसन अफ इन्डियाले चार अर्ब ५१ करोड रुपैयाँको प्रस्ताव गरे पनि प्रिस्टिन मेगा लजिष्टिक पार्क प्रालिले उच्च बोलकबोल गरेकाले छनोट भएको हो। यसअघि पनि यही कम्पनीले तीन अर्ब ३३ करोड रुपैयाँमा पाँच वर्षका लागि बन्दरगाह सञ्चालनको जिम्मा पाएको थियो। वीरगञ्जको सिर्सियास्थित यो सुक्खा बन्दरगाह ५७ बिघा क्षेत्रफलमा फैलिएको छ।
सन् २००० मा विश्व बैंकको ८२ करोड रुपैयाँ सहयोगमा निर्माण सम्पन्न भएको बन्दरगाहमा कार्गो रेलमार्फत मात्रै मालसामान ढुवानी गरिन्छ। भारत सरकारले २० करोड रुपैयाँको लागतमा रक्सौलदेखि बन्दरगाहसम्म रेल लिङ्क निर्माण गरेको थियो।
भन्सार कार्यालयका अनुसार चालु आर्थिक वर्षको आठ महिनामा ३२ अर्ब ३२ करोड रुपैयाँ राजस्व संकलन भएको छ भने गत आवमा ४७ अर्ब ३१ करोड रुपैयाँ राजस्व संकलन गरिएको थियो।
प्रतिक्रिया