महिला-यू १९ एसिया कपः समूह विजेता बन्दै नेपाल सेमिफाइनलमा

काठमाडौं । मलेसियामा जारी एसीसी यू १९ महिला एसिया कप क्रिकेट अन्तर्गत आज भएको खेलमा नेपाल र भारतले अंक बाडेका छन् ।

बर्षाका कारण खेल प्रभावित भएपछि नेपाल र भारतले समान १-१ अंक बाँडेका हुन् । योसँगै नेपाल ३ अंकसहित शीर्ष स्थानमा रहँदै सेमिफाइनलमा पुगेको छ । यस्तै समान ३ अंक रहेको भारत पनि दोस्रो स्थानमा रहँदै सेमिफाइनल प्रवेश गरेको छ । नेपालले समूह चरणको आफ्नो पहिलो खेलमा पाकिस्तानलाई ६ विकेटले पराजित गरेको थियो ।

आज भएको दोस्रो खेलमा नेपालले टस हारेर पहिले ब्याटिङ गरेको थियो । नेपालले दिएको ९५ रनको झिनो लक्ष्य पछ्याएको भारतले ३ दशमलव १ ओभरमा २८ रन जोड्दा बर्षा भएको थियो ।

बर्षा नरोकिएपछि नेपाल र भारतबीचको खेल अंक बाँडेर सकिएको हो ।