एनपीएल विशेषः जनकपुरलाई पराजित गर्दै प्लेअफ नजिक चितवन

काठमाडौं । जारी नेपाल प्रिमियर लिग (एनपीएल) अन्तर्गत शनिबार भएको दोस्रो खेलमा जनकपुर बोल्ट्स चितवन राइनोजसँग पराजित भएको छ ।

रोमाञ्चक खेलमा जनकपुर चितवनसँग ३२ रनले पराजित भएको हो । जितसँगै तेस्रो स्थानमा उक्लिएको चितवन प्ले अफ नजिक पुगेको छ । चितवनले दिएको १ सय ८१ रनको लक्ष्यमा जवाफी ब्याटिङ गरेको जनकपुरले १८ ओभरमा अलआउट हुँदै १ सय ४८ रन बनायो ।

जनकपुरका लागि जेम्स निशामले विस्फोटक अर्धशतकीय पारी खेले । उनले २४ बलमा ५ चौका र ६ छक्का प्रहार गर्दै ६५ रन बनाए । यद्यपि, जनकपुरको जितको लागि पर्याप्त हुन सकेन । आसिफ शेखले २३, शुभ कंशकारले १५ र मोहम्मद मोहसिनले १३ रन बनाए ।

यसअघि टस जितेर ब्याटिङ रोजेको चितवनले पूरै ओभर खेलेर ५ विकेटको क्षतिमा १ सय ८० रन बनाएको थियो ।