एनपिएल विशेषः सुपर ओभरमा सन्दिप महंगो साबित, पोखरासँग बिराटनगर १३ रनले पराजित

एनपिएल अन्तरगत विहिबारको पहिलो खेलमा विराटनगर किंग्सलाई सुपर ओभरमा हराउँदै पोखरा एभेन्जर्स विजयी भएको छ । एनपिएल इतिहासको पहिलो सुपर ओभरमा पोखराले विराटनगरमाथि १३ रनले विजयी भयो ।

सुपर ओभरमा पहिले ब्याटिङ गरेको पोखराले १८ रन बनाएको थियो । विराटनगरका तर्फबाट बलिङ गर्न आएका कप्तान सन्दिप लामिछानेले अपेक्षीत बलिङ गर्न नसक्दा २ छक्का र १ चौकाको शिकार बनेका थिए । १९ रनको लक्ष्य पछ्याएको बिराटनगरका लागि माटिंन गप्टिल र निकोलस किर्तनको ब्याट नचल्दा केवल ५ रन बनाउन सक्यो ।

त्यसअघि विराटनगरले दिएको १ सय ४० रनको लक्ष्य पछ्याएको पोखराले २० ओभरमा ६ विकेट गुमाएर १ सय ३९ रन बनाए पछि खेल सुपर ओभरमा धकेलिएको थियो । अन्तिम ओभरमा १४ रन आवश्यक रहेकोमा बासिर अहमदले १३ रन खर्चिएका थिए । दुवै टोलीको स्कोर बराबर भएपछि खेल सुपर ओभरमा पुगेको थियो । जितसँगै पाँच खेलबाट ४ अंक जोडेको पोखराले प्ले अफ पुग्ने सम्भावना कायमै राखेको छ । समान खेलबाट केवल २ अंक जोडेको बिराटनगरको भने प्लेअफ सम्भावना लगभग सकिएको छ ।