काठमाडौं । जारी नेपाल प्रिमियर लिग (एनपीएल) अन्तर्गत बुधबार भएको दोस्रो खेलमा लुम्बिनी लायन्स काठमाडौं गुर्खाजसँग पराजित भएको छ ।
लिग चरणको छैटौँ खेलमा काठमाडौंसँग १८ रनले पराजित भएसँगै लुम्बिनीको प्ले अफ दौड समेत रोकिएको छ । यसअघि लगातार ४ खेलमा पराजित भएको लुम्बिनीले मंगलबार चितवन राइनोजलाई पराजित गरेको थियो । लुम्बिनी जनकपुर बोल्ट्स, सुदूरपश्चिम रोयल्स, पोखरा एभेन्जर्स, र विराटनगर किंग्ससँग पराजित भएको थियो ।
चितवनलाई हराउँदै २ अंक जोडेको लुम्बिनी पाँचौं स्थानमा उक्लिएको थियो । प्लेअफमा पुग्ने सम्भावना कायम राख्न लिग चरणको अन्तिम २ खेलमा गुर्खाज र पोखरा एभेन्जर्सविरुद्ध जित हासिल गर्नै पर्ने लुम्बिनीलाई दबाब थियो । काठमान्डुले दिएको १०४ रनको लक्ष्यमा जवाफी ब्याटिङ गरेको लुम्बिनी १९ दशमलव २ ओभरमा अलआउट हुँदै ८५ रनमा सिमित भयो ।
लुम्बिनीका सन्दीप जोराले २६ बनाउँदा उन्मुक्त चन्दले १४ रन बनाए । अन्य खेलाडीले दोहोरो अंक छुन सकेनन् । गुर्खाजका लागि कप्तान करण केसीले ४ तथा दीपेश कँडेलले ३ र गेर्हार्ड इरास्मसले २ विकेट लिए ।
यसअघि टस जितेर पहिले ब्याटिङ गरेको गुर्खाज काठमान्डु १९ दशमलव २ मा अलआउट हुँदै १ सय ३ रनमा सीमित भएको थियो ।
प्रतिक्रिया