एनपीएल विशेषः अपराजित जनकपुरलाई सुदूरपश्चिमको चुनौती !

काठमाडौं । जारी नेपाल प्रिमियर लिग (एनपीएल) अन्तर्गत बुधबार हुने पहिलो खेलमा जनकपुर बोल्ट्स र सुदूरपश्चिम रोयल्स भिड्दैछन् ।

त्रिवि क्रिकेट मैदानमा हुने पहिलो खेल बिहान सवा ९ बजे सुरु हुँदैछ । हालसम्मको प्रदर्शनका आधारमा हेर्नेहो भने दुवै टिम उत्कृष्ट मानिएका छन् । त्यसैकारण पनि आजको यो खेल निकै रोचक हुने अपेक्षा समेत गरिएको छ । यद्यपि चार खेल खेलिसक्दा जनकपुर बोल्ट्सले चारै खेल आफ्नो पक्षमा पारेको छ भने सुदूरश्चिम रोयल्सले चार मध्ये १ खेलमा पराजित भएको थियो। बाँकी तीन खेलमा उसले सानदार जित निकालेको छ।

जनपुर बोल्ट्सले पहिलो खेलमा विराटनगर किंग्सलाई ८ विकेटले पराजित गरेको थियो। दोस्रो खेलमा कर्णालीलाई आठै विकेटमा पराजित गरेको जनकपुरले तेस्रो खेलमा पोखरालाई सात विकेटले पराजित गरेको थियो । जनकपुरले लुम्बिनी लायन्सविरूद्ध भने संघर्षपूर्ण जित निकालेको थियो।१ सय ३६ रनको लक्ष्य पछ्याएको जनकपुरले ८ विकेट गुमाएर १ रनले मात्रै लुम्बिनीविरूद्ध जित निकालेको थियो।

यता चार खेल खेलिसकेको सुदूरश्चिम रोयल्सले तीन खेलमा सानदार जित निकालेको छ। उसले पनि पहिलो खेलमा विराटनगरलाई ९० रनले पराजित गरेको थियो । दोस्रो खेलमा काठमाडौं गुर्खाजलाई ७३ रनले पराजित गरेको सुदूरपश्चिमले आफ्नो तेस्रो खेलमा लुम्बिनी लायन्सलाई पराजित गरेको थियो ।

सुदूरपश्चिमले आफ्नो चौथो खेलमा भने चितवन राइनोजसँग ३३ रनले पराजित हुँदै हारको स्वाद चाखेको थियो ।