काठमाडौं । कप्तान सन्दीप जोराको उत्कृष्ट ब्याटिङ र प्रतिश जिसीको सानदार बलिङमा नेपालले जारी द हङकङ सिक्सेसमा अस्ट्रेलियाविरुद्ध ११ रनको सनसनीपूर्ण जित निकालेको छ ।
नेपालले दिएको १ सय १२ रनको लक्ष्य पछ्याएको अस्ट्रेलियाले निर्धारित ६ ओभरमा सबै विकेट गुमाउँदै सय रन मात्र बनाउन सक्यो । अस्ट्रेलियाका लागि ज्याक वुडले १६ बलमा ५५ रन बनाए । त्यस्तै एलेक्स रोसले १४ रन बनाए । नेपालका लागि प्रतिश जिसीले ३ विकेट लिए । २ ओभर बलिङ गरेका उनले मात्र २४ रन खर्चिए ।
त्यस्तै लोकेश बमले १ ओभरमा १३ रन खर्चिएर १ विकेट लिए । यसअघि टस हारेर पहिले ब्याटिङ गरेको नेपालले निर्धारित ६ ओभरमा २ विकेट गुमाउँदै १ सय ११ रन बनाएको थियो । यसअघि शुक्रबार नेपालले इंग्ल्यान्डलाई ६ विकेटले हराएको थियो । नेपाल पुल बी बाट क्वार्टरफाइनल प्रवेश गरिसकेको छ ।
क्वार्टरफाइनलमा नेपालले श्रीलंकासँग आजै खेल्दैछ ।
प्रतिक्रिया