तेस्रो अभ्यास खेलमा नेपाल विजयी, करण र कुशल भुर्तेलको उत्कृष्ट प्रदर्शन

काठमाडौं । करण केसी र कुशल भुर्तेलको उत्कृष्ट ब्याटिङले क्यानडाको हाइप्रोफोमेन्स (एचपी) विरुद्धको तेस्रो अभ्यास खेलमा नेपाललाई जित दिलाएको छ ।

खेलमा तीव्र गतिका बलर करण केसीको पाँच विकेट लिएका थिए भने कुशल भुर्तेलले अर्धशतक बनाएका थिए । केसी र भुर्तेललको उत्कृष्ठ प्रदर्शनकै कारण नेपालले क्यानडाको हाइप्रोफोमेन्स (एचपी) लाई १० रनले हराउन सफल भएको थियो । यो जितसँगै तीन खेलको अभ्यास खेल नेपालले २–१ ले जितेको छ ।

नेपालले दिएको १ सय ८८ रनको लक्ष्य पछ्याएको क्यानडा ४४ दशमलव ५ ओभरमा १ सय ७७ रनमा अल आउट भयो । क्यानडाका अली नदिमले १ सय १६ बलमा ७ चौका र ३ छक्कासहित ८५ रनको योगदान दिए । नेपालका करण केसीले ९ दशमलव ५ ओभरमा ५५ रन खर्चेर ५ विकेट लिए ।

सागर ढकालले २, आरिफ शेख, रिजन ढकाल र ललितनारायण राजवंशीले १–१ विकेट लिए । त्यसअघि टस जितेर पहिला ब्याटिङ थालेको नेपाल ४८ दशमलव ३ ओभरमा १ सय ८७ रनमा अल आउट भयो ।

नेपालका कुशल भुर्तेलले तल्लोक्रममा ७० बलमा ५ चौकासहित सर्वाधिक ५२ रन बनाए ।