काठमाडौं । आजबाट सुरु भएको एभरेष्ट महिला भलिबल लिगमा ललितपुर क्विन्सले विजयी शुरुवात गरेको छ।
त्रिपुरेश्वरस्थित राष्ट्रिय खेलकुद परिषद्को कभर्डहलमा आज भएको उदघाटन खेलमा ललितपुर क्विन्सले काठमाडौँ स्पाइकर्सलाई ३–१ सेटले पराजित गरेको हो। ललितपुरले पहिलो सेट २५–२० ले आफ्नो पक्षमा पार्यो तर दोस्रो सेट भने काठमाडौँलाई सुम्पिन पुग्यो।
दोस्रो सेटमा उत्कृष्ट पुनरागमन गर्दै काठमाडौँले २५–२१ ले खेल आफ्नो पक्षमा पार्दै सेट १–१ को बराबरीमा ल्याएको थियो। तेस्रो सेटमा ललितपुरले बाजी मार्दै खेल २५–२१ ले आफ्नो पक्षमा पारेको थियो। चौथो तथा निर्णायक सेटमा ललितपुरले खेल एकपक्षीय रुपमा लिँदै काठमाडौँलाई २५–१९ ले पाखा लगाउँदै खेल जित्यो।
इन्फिनिटी ड्रिम्स प्रालिको आयोजनामा नेपाली भलिबल इतिहासमै पहिलो पटक भइरहेको प्रतियोगितामा ६ फ्रेन्चाइज टोली सहभागी छन्।
प्रतिक्रिया