दाङको टरिगाउँ विमानस्थलमा अबदेखि शुक्रबार मात्रै उडान हुने

दाङ । तुलसीपुरस्थित टरिगाउँ विमानस्थलमा नेपाल वायुसेवा निगमले प्रत्येक शुक्रबार मात्र उडान भर्ने भएको छ।

निगमको एउटा जहाज ‘ग्राउण्डेड’ भएकाले शुक्रबार मात्र उडान भर्ने तय भएको हो । प्रत्येक शुक्रबार दिउँसो १२ः०० बजे टरिगाउँ जाने र १२ः२० मा फर्किने तालिका रहेको छ । हाल दाङबाट काठमाडौं जाँदा सात हजार १०० र काठमाडौंबाट दाङ आउँदा सात हजार २५० रुपैयाँ भाडा लाग्छ।

यसअघिको शुक्रबार दाङबाट काठमाडौँ जाँदा एकजना मात्र यात्रु थिए। टरिगाउँ विमानस्थलमा पछिल्लो समय जहाज सेवा अनियमित भएको थियो। केही महिना जहाज नै आएन, तर अब त्यसो नहुने विमानस्थल प्रशासनले जनाएको छ । यहाँको विमानस्थल २०११ सालमा स्थापना भएको हो।

७५० मिटर लम्बाइ रहेको धावनमार्ग हुँदा अहिले १९ सिटे जहाज मात्र बस्ने गरेका छन्। यसलाई बढाएर एक हजार ५०० मिटर बनाउन सके ७२ सिट जहाज बस्ने र सेवा नियमित हुने बताइन्छ।