उरुग्वेलाई हराउँदै कोलम्बिया फाइनलमा

काठमाडौं । कोलम्बिया कोपा अमेरिका फुटबलको फाइनलमा प्रवेश गरेको छ ।

उरुग्वेलाई १–० गोलले हराउँदै कोलम्बिया उपाधि नजिक पुगेको हो । १५ पटकको च्याम्पियन उरुग्वेलाई यसपटक कोलम्बियाले सेमिफाइनलबाटै घर फर्काइदिएको छ । पहिलो हाफको ३९औँ मिनेटमा जेफ्रिसन लिर्माले गरेको गोल नै कोलम्बियालाई फाइनल पुग्न पर्याप्त भयो । पहिलो हाफको अतिरिक्त समयमा कोलम्बियाका डानियल मुनोज रातो कार्ड पाउँदै मैदानबाट बाहिरिएपछि कोलम्बिया १० खेलाडीमा सिमित भएको थियो ।

निकै आक्रामक खेलेको उरुग्वेले गोलका लागि प्रयास गरे पनि सफल हुन सकेन । पछिल्ला २७ खेलमा अपराजित कोलम्बिया २३ वर्षपछि कोपा उपाधि जित्ने योजनामा अघि बढेको छ । कोलम्बियाले २००१ मा पहिलो पटक कोपा जितेको थियो । कोलम्बियाले उपाधिका लागि अब अर्जेन्टिनासँग खेल्नेछ ।

अर्जेन्टिना १५ पटकको विजेता पनि हो । साविक विजेता अर्जेन्टिना क्यानाडालाई २–० ले पराजित गर्दै फाइनल पुगेको हो ।