पानामालाई ५–० गोल अन्तरले पराजित गर्दै कोलम्बिया सेमिफाइनलमा

एजेन्सी । जारी कोपा अमेरिका २०२४ अन्तर्गत आइतबार बिहान भएको खेलमा पानामलाई ५–० गोल अन्तरले पराजित गर्दै कोलम्बिया सेमिफाइनलमा प्रवेश गरेको छ ।

अरिजोनास्थित स्टेट फार्म स्टेडियममा भएको क्वाटरफाइनल खेलमा कोलम्बियाले पहिलो हाफमा तीन र दोस्रो हाफमा दुई गोल गरेको थियो । उसका लागि जुवान कोर्डोबाले आठौं मिनेटमा गोल गर्दै अग्रता दिलाएका थिए । जेम्स रोड्रिगजेले १५औं मिनेटमा पेनाल्टीमार्फत गोल गरे भने लुइस डियाजले ४१औं मिनेटमा गोल गरे ।

यस्तै रिचार्ड रिओसले ७०औं र मिगुएल बवर्जाले इन्जुरी टाइमको चौथो मिनेटमा गोल गरे । कोलम्बिया लगातार दोस्रो पटक कोपा अमेरिकाको सेमिफाइनलमा प्रवेश गरेको हो ।

यसअघि २०२१ मा भएको कोपामा कोलम्बिया सेमिफाइनलमा अर्जेन्टिनासँग पेनाल्टीसुटआउटमा पराजित भएको थियो ।