एजेन्सी । हज यात्राका लागि विभिन्न देशहरुबाट साउदी अरब पुगेकाहरु मध्ये गर्मीका कारण मृत्यु हुने संख्या १ हजार ३ सय नाघेको छ ।
साउदी सरकारले हालसम्म मृत्यु हुनेको संख्या १ हजार ३ सय १ रहेको पुष्टि गरेको छ । साउदी अधिकारीहरुका अनुसार मृतकमध्ये अधिकांस अनाधिकृत तीर्थयात्रीहरू छन् उनीहरुले चर्को गर्मीमा लामो दूरीसम्म पैदल यात्रा गरेका थिए । ज्यान गुमाउनेमध्ये तीन चौथाई भन्दा बढीसँग त्यहाँ जाने आधिकारिक अनुमति नभएको साउदी सरकारको दाबी छ ।
साउदी अरेबियाको राष्ट्रिय मौसम विज्ञान केन्द्रका अनुसार मक्काको तापक्रम ५१ द्यशमलव ८ डिग्री सेल्सियससम्म पुगेको छ । मृतकहरु मध्ये ६ सय ५८ जना इजिप्टका नागरिक भएको बताइएको छ । इन्डोनेसियाले आफ्ना २ सय भन्दा बढी नागरिकको ज्यान गुमाएको बताएको छ भने भारतले ९८ जनाको मृत्यु भएको जनाएको छ । पाकिस्तान, मलेसिया, जोर्डन, इरान, सेनेगल, सुडानले पनि आफ्ना नागरिकको मृत्यु भएको बताएका छन् ।
हजका लागि यस वर्ष करिब १८ लाख मानिस मक्का मदिना पुगेको साउदी अरेबियाले जनाएको छ ।
प्रतिक्रिया