एजेन्सी । जारी आईसीसी टी–२० विश्वकपको सुपर–८ चरणको गएराति भएको खेलमा दक्षिण अफ्रिकाले इङ्ल्याण्डलाई ७ रनले पराजित गरेको छ ।
ड्यारेन सामी राष्ट्रिय क्रिकेट स्टेडियम, सेन्ट लुसियामा भएको खेलमा दक्षिण अफ्रिकासँग इङ्ल्याण्ड पराजित भएको हो । दक्षिण अफ्रिकाले दिएको १ सय ६४ रनको लक्ष्य पछ्याएको इङ्ल्याण्डले निर्धारित २० ओभरमा ६ विकेट गुमाएर १ सय ५६ रन मात्रै बनाउन सक्यो । इङ्गल्याण्डका लागि ह्यारी ब्रुकले सर्वाधिक ५३ रनको योगदान दिए ।
३७ बलको सामना गरेका ब्रुकले ७ चौका प्रहार गरेका थिए । यस्तै, लियाम लिभिङस्टोनले ३३ रन जोड्दा कप्तान जस बट्लरले १७, जोनी बेयरस्टोले १६, फिल साल्टले ११ र मोइन अलीले ९ रन जोड्दा साम कुरान १० र जोफ्रा आर्चर १ रनमा नटआउट रहे । दक्षिण अफ्रिकाका लागि कगिसो रबाडा र केशव महाराजले समान २/२ तथा ओटनिल बार्टम्यान र एनरिक नोर्टजेले १/१ विकेट लिएका थिए ।
त्यसअघि पहिले ब्याटिङ गरेको दक्षिण अफ्रिकाले निर्धारित २० ओभरमा ६ विकेट गुमाएर १ सय ६३ रनको योगफल तयार पारेको थियो ।
प्रतिक्रिया