फिफा विश्व वरीयतामा नेपालको तीन स्थान सुधार

काठमाडौं । फिफा वरीयतामा नेपालले तीन स्थान सुधार गरेको छ ।

विश्व फुटबलको सर्वोच्च निकाय विश्व फुटबल महासंघ (फिफा)ले आज सार्वजनिक गरेको पुरुष फुटबलको नयाँ वरीयतामा नेपालले तीन स्थान सुधार गर्दै १ सय ६८औँ स्थानमा उक्लिएको हो । यसअघि नेपाल १ सय ७१औँ स्थानमा रहेको थियो । नेपाल दक्षिण एसियाली राष्ट्रको वरीयतामा तेस्रो स्थानमा छ । गत मे महिनाको अन्तिममा पछिल्लोपटक फिफाको वरीयता सार्वजनिक हुँदा नेपालको अंक ९ सय ६८ रहेको थियो ।

अहिलेको नयाँ वरीयतामा नेपालले चार अंक बटुल्दै ९ सय ७२ बनाएको छ । नेपालभन्दा अगाडि भारत र माल्दिभ्स रहेका छन् । भारत १ सय ५औँ स्थानमा छ भने माल्दिभ्स १ सय ५८औँ स्थानमा रहेको छ । नेपालभन्दा तल भुटान, बंगलादेश, श्रीलंका र पाकिस्तान रहेका छन् । बंगलादेश १ सय ८८औँ स्थानमा छ भने भुटान १ सय ८७औँ स्थानमा छ ।

त्यस्तै, पाकिस्तान १ सय ९८औँ स्थानमा रहँदा श्रीलंका २ सय ५औँ स्थानमा छ ।