नेपाल र बंगलादेश भिड्दै, बर्षाले खेल विथोल्ने सम्भावना कति ?

वेष्ट इन्डिज र अमेरिकामा जारी आईसीसी टी–२० विश्वकप अन्तर्गत नेपालले आफ्नो चौथो र अन्तिम खेल सोमबार खेल्दैछ ।

उक्त खेलमा नेपाल र बंगलादेशबीच प्रतिष्पर्धा हुनेछ । खेल नेपाली समय अनुसार बिहान ५ बजेर १५ मिनेटमा क्यारेबियन क्षेत्रको किङ्सटाउनस्थित निकै पुरानो आर्नोस भेल स्टेडियममा हुनेछ । सोमबार बिहानको खेल नेपाल भन्दा पनि बंगलादेशका लागि निकै महत्वपूर्ण रहेको छ । शनिबार दक्षिण अफ्रिकासँग भएको खेलमा पराजित भएसँग नेपाल सुपर–८ को दौडबाट बाहिरिसकेको छ । तर, बंगलादेशको भने सुपर–८ मा पुग्ने सम्भावना निकै बलियो रहेकाले पनि नेपाल सँगको खेलमा बंगलादेश ‘गर या मर’ को अवस्थामा रहने छ ।

बंगलादेशविरुद्धको खेलमा नेपाली टोली भने आफ्नो प्रतिष्ठा उच्च बनाउने उद्देश्यले मात्रै मैदानमा ओर्लिने छ । हालसम्म विश्वकपको सुपर– ८ चरणका लागि सातवटा टोलीको टुङ्गो लागिसकेको छ । बाँकी एक टोलीको टुङ्गो लाग्न बाँकी रहेको अवस्थामा समूह डी बाट बंगलादेश र नेदरल्यान्ड्स सुपर–८ मा आफ्नो स्थान सुरक्षित गर्ने दाउमा छन् । त्यसका लागि सोमबार नै बंगलादेशले नेपालको सामना गर्नेछ भने नेदरल्यान्ड्सले श्रीलंकाको सामना गर्दैछ ।

नेदरल्यान्ड्स र श्रीलंकाबिचको खेल भने नेपाली समय अनुसार सोमबार बिहान ६ बजेर १५ मिनेटमा क्यारेबियन राष्ट्र सेन्ट लुसियाको ड्यारेन सामी क्रिकेट स्टेडियममा खेलिने छ । अन्तर्राष्ट्रिय किक्रेट काउन्सिल (आईसीसी) ले घोषणा गरेको पछिल्लो टी–२० अन्तर्राष्ट्रिय वरीयतालाई हेर्दा नेपाल १७ औँ स्थानमा रहेको छ भने बंगलादेश नवौँ स्थानमा रहेको छ । उक्त वरीयतामा श्रीलंका ८ औँ र नेदरल्यान्ड्स भने १५ औँ स्थानमा रहेका छन् ।

समूह डी बाट चार मा चार खेल जित्दै दक्षिण अफ्रिकाले यसअघिनै सुपर–८ मा आफ्नो स्थान सुरक्षित गरिसकेको छ । सोमबार बिहान हुने दुई खेलसँगै समूह डी का समूह चरणका सवै खेल सकिने छन् । उक्त समूहमा ८ अंकसहित दक्षिण अफ्रिका पहिलो, ४ अंकसहित बंगलादेश दोस्रो र दुई अंकसहित नेदरल्यान्ड्स तेस्रो स्थानमा रहेको छ । समान एक–एक अंक बटुलेका नेपाल र श्रीलंका भने समूह चरणबाट घर फर्किने भएका छन् । समूह डी अन्तर्गत सोमबार बिहान हुने खेलमा नेपाललाई पराजित गरे बंगलादेश ६ अंकसहित सुपर–८ मा पुग्नेछ ।

नेपाल र बंगलादेशबीचको खेल बर्षाका कारण विथोलियो वा बराबरी भयो भने पनि ५ अंकसहित बंगलादेशले आफ्नो सुपर–८ को यात्रा तय गर्नेछ । तर, नेपालसँग पराजित भएको खण्डमा भने बंगलादेशको सुपर–८ को यात्रा श्रीलंका र नेदरल्यान्ड्सबीचको खेलमा निर्भर रहनेछ । नेदरल्यान्ड्स श्रीलंकासँग पराजित भएमा वा खेल रद्द भएमा बंगलादेश सजिलै सुपर–८ मा पुग्नेछ । तर, नेदरल्यान्ड्सले श्रीलंकालाई पराजित गरेको अवस्थामा भने बंगलादेश र नेदरल्यान्ड्सको समान ४–४ अंक हुनेछ । यस्तोमा सुपर–८ मा पुग्ने टोलीको टुङ्गो नेट रन रेटका आधारमा लाग्नेछ ।

हाल बंगलादेश भन्दा नेदरल्यान्ड्स नेट रन रेटमा पनि निकै पछाडी छ । बंगलादेशको नेट रन रेट ०.४७८ छ भने नेदरल्यान्ड्सको नेट रन रेट –०.४०८ रहेको छ । आईसीसी टी–२० विश्वकपमा नेपालको यो दोस्रो सहभागिता हो र विश्वकपमा बंगलादेश सँगको भेट पनि दोस्रो पटक नै हो । बंगलादेशमा सम्पन्न २०१४ को टी–२० विश्वकपमा नेपाल पहिलो पटक सहभागि भएको थियो । उक्त विश्वकपको समूह चरणका खेलमा नेपाल समूह ए मा परेको थियो ।

उक्त समूहमा आयोजक बंगलादेश, अफगानिस्तान र हंकङ पनि थिए । नेपालले आफ्नो पहिलो खेलमा हङ्कङ्लाई ८० रनले पराजित गरेको थियो । दोस्रो खेलमा भने नेपाली टोली आयोजक बंगलादेशसँग ८ विकेटले पराजित भएको थियो । यस्तै समूह चरणको अन्तिम खेलमा नेपालले अफगानिस्तानलाई ९ रनले पराजित गरेको थियो । समूहचरणमा नेपाल र बंगलादेश दुवैले दुई–दुई खेलमा जित र एक–एक खेलमा हार व्यहोरेका थिए ।

यस हिसाबले नेपाल र बंगलादेशसँग समान ४–४ अंक रहेको थियो । तर, नेट रन रेटका आधारमा नेपालभन्दा अगाडि रहँदै बंगलादेश सुपर १० चरणमा पुग्न सफल भएको थियो । आज ठिक १० बर्षपछि नेपाली टोलीले विश्वकपको मैदानमा त्यहि बंगलादेश सँग भेट्दैछ । यस्तोमा नेपालले कस्तो नतिजा निकाल्छ ? कुनै दबाबमा नरहेको नेपाली टोलीको टेस्ट राष्ट्र बंगलादेशसँगको पुरानो बदला लिन सक्ला ? त्यो भने हेर्नैपर्नैछ ।

यद्यपी नेपाल र बंगलादेशबीचको खेल बर्षाका कारण विथोलिन्छ कि भन्ने डर पनि एकातिर छँदै छ । खेल हुने दिन सोमबार किङ्सटाउनमा बर्षाको सम्भावना रहेको जल तथा मौसम विज्ञान विभागले जनाएको छ । अन्तर्राष्ट्रिय सञ्चार माध्यमका अनुसार खेल हुने समयमा बर्षाको सम्भावना रहेको जनाइएको छ ।

यस्तो अवस्थामा खेल रद्द हुने सम्भावना पनि बलियो देखिएको छ । यसअघि बर्षाकै कारण नेपाल र श्रीलंकाबीचको खेल पनि रद्द भएको थियो ।