एजेन्सी । जारी टी–२० विश्वकपमा समूह डी अन्तर्गतको खेलमा दक्षिण अफ्रिकाले नेदरल्यान्ड्सलाई ४ विकेटले हराएको छ ।
नेदरल्यान्ड्सले प्रस्तुत गरेको १ सय ४ रनको लक्ष्य दक्षिण अफ्रिकाले ६ विकेटको क्षतिमा १८ दशमलव ५ ओभरमा पुरा गरेको हो । प्रतियोगितामा दक्षिण अफ्रिकाको लगातार दोस्रो जित हो । टोलीका लागि डेभिड मिलर नायक बने । उनले ५१ बलमा नटआउट रहँदै ५९ रन बनाएर टोलीलाई जित दिलाए । उनले यस क्रममा ३ चौका र ४ छक्का प्रहार गरे ।
ट्रिस्टन स्टब्सले ३७ बलमा ३३ रन जोड्दै मिलरलाई राम्रो साथ दिए । उनीबाहेक अन्य ब्याटरले दोहोरो अंकमा रन जोड्न सकेनन् । दक्षिण अफ्रिकाले खेलमा खराब सुरुवात गरेको थियो । ३ रनमा ३ विकेट गुमाएको टोलीले १२ रन जोड्दा ४ विकेट गुमाइसकेको थियो । त्यसपछि मिलर र स्टब्स मिलेर टोलीको इनिङ्स सम्हाले ।
यसअघि टस हारेर पहिले ब्याटिङ गरेको नेदरल्यान्ड्सले निर्धारित २० ओभरमा ९ विकेटको क्षतिमा १ सय ३ रन बनाएको थियो ।
प्रतिक्रिया