काठमाडौं । ओपनरद्वय कुशल भुर्तेल र आशिफ शेखको उत्कृष्ट ब्याटिङ प्रर्दशन सँगै ओमानमा जारी एसीसी प्रिमियर कपमा नेपालले लगातार तेस्रो जीत निकालेको छ ।
सोमबार हङकङ विरुद्ध भएको आफ्नो समूह चरणको तेस्रो खेलमा नेपाल ८ विकेटले विजयी भएको थियो । हङकङले दिएको १ सय १५ रनको लक्ष्य पछ्याएको नेपालले १२ दशमलव २ ओभरमा २ विकेट गुमाएर पुरा गरेको हो । यो सँगै नेपालले एसीसी प्रिमियर कपको सेमिफाइनलमा आफ्नो स्थान सुरक्षित गरेको छ ।
नेपाल लागि ओपर आशिफ शेखले सर्वाधिक ४० रन जोड्न सफल भएका थिए । उनले १७ बलमा ४० रन जोडेका थिए भने अर्का ओपनर कुशल भुर्तेलले १८ बल खेल्दै ३२ रनको योगदान गरेका थिए । यस्तै कप्तान रोहित पौडेलले २० बलको मद्दतमा २५ रन र सन्दिप जोराले १७ बलको सहयोगमा १९ रन जोडेका थिए ।
यसअघि टस हारेर ब्याटिङको निम्तो पाएको हङकङले १७ दशमलव ५ ओभरमा सवै विकेट गुमाएर जम्मा १ सय १४ रन बनाउन सकेको थियो । बलिङतर्फ नेपालका लागि नेपालका लागि दिपेन्द्रसिंह ऐरी र अविनाश बोहराले समान ३/३ विकेट लिएका थिए ।
यस्तै ललित राजवंशीले २ विकेट लिएका थिए भने करण केसी र गुल्शन झाले समान १/१ विकेटको योगदान गरेका थिए ।
प्रतिक्रिया