काठमाडौं । दक्षिण अफ्रिकामा जारी आईसीसी यू–१९ विश्वकप क्रिकेटमा नेपाल लगातार दुई खेलमा पराजित भएको छ ।
बुधवार राति सकिएको आफ्नो दोस्रो खेलमा नेपाल पाकिस्तानसँग ५ विकेटले पराजित भएको हो । जनवरी २२ मा भएको पहिलो खेलमा भने नेपाल न्यूजिल्यान्डसँग ६४ रनले पराजित भएको थियो । समूह डी मा रहेको न्यूजिल्यान्ड २ खेलमा जित निकाल्दै यस अघिनै सुपर सिक्समा आफ्नो स्थान सुरक्षित गरिसकेको थियो ।
बुधबार भएको आफ्नो दोस्रो खेलमा नेपाललाई हराएसँगै पाकिस्तान पनि सुपर सिक्समा पुगेको छ । नेपालले दिएको १ सय ९८ रनको लक्ष्य पाकिस्तानले ४७ दशमलव ४ ओभरमा ५ विकेट गुमाएर पुरा गरेको थियो । समुह डी मा रहेका नेपाल र अफगानिस्तानले भने न्यूजिल्यान्ड र पकिस्तान दुवैसँग पराजय व्याहोरी सकेका छन् ।
समुह चरणको अन्तिम खेलमा नेपाल र अफगानिस्तान भिड्दैछन् । शुक्रबार दिउँसो हुने खेलमा दुवै टोली आफ्नो सुपर सिक्सको यात्रा तय गर्न प्रतिष्पर्धा गर्नेछन् । हरेक समुहका शीर्ष तीन टोली सुपर सिक्समा पुग्नेछन् । आफ्नो अन्तिम खेलमा अफगानिस्तानलाई हराउन सफल भए नेपालले सुपर सिक्सको यात्रा तय गर्न सक्नेछ ।
त्यसका लागि नेपालले शुक्रबारको खेल जित्नै पर्ने हुन्छ । अफगानिस्तानलाई हराएको खण्डमा नेपाल सुपर सिक्समा पुग्नेछ अन्यथा नेपाल विश्वकपबाट बाहिरिने छ । यस्तोम अझै पनि सुपर सिक्समा पुग्ने नेपालको सम्भावना कायमै छ । अर्कोतिर न्यूजिल्यान्ड र पाकिस्तान भने अब समुह विजेता बन्नलाई प्रतिष्पर्धा गर्नेछन् ।
सो खेल शनिबार दिउँसो हुनेछ ।
प्रतिक्रिया