काठमाडौं । सुन्दर अटो ईन्जिनियरिङले गन्तव्य ईभी १००–एस मोटरसाइकल सार्वजनिक गरेको छ ।
सुन्दरले बिहिबार एक कार्यक्रमको आयोजना गरी गन्तव्य मोटरसाइकल सार्वजनिक गरेको हो । कम्पनीले आफ्नै डिजाइन तयारी गरी सो इलेक्ट्रिक मोटरसाइकल नेपालमै बनाएको थियो । पछिल्लो समय विद्युतिय सवारीको माग बढीरहेको अवस्थामा नेपालको प्रविधि र स्रोत साधनको प्रयोग गरी निर्माण गरिएको मोटरसाइकल बजारमा ल्याउन पाउँदा खुसी लागेको सुन्दर यातायातका अध्यक्ष भेषबहादुर थापाले बताए ।
अध्यक्ष थापाले उक्त मोटरसाइकलमा ३० देखि ४० प्रतिशत सामाग्री नेपाली र बाँकी अन्य देशबाट ल्याएर तयार गरिएको जानकारी दिए । ‘गन्तव्य ईभीको जाँच पास सरकारी निकायबाट भइसकेको र नम्बर प्लेट प्राप्तिको तयारीमा रहेको पनि अध्यक्ष थापाले बताए । गन्तव्य मोटरसाइकलमा १५०० वाटको मोटर र ५१.२ भोल्टेजको ब्याट्रीको जडान भएको छ । सुन्दर अटोका अनुसार यस बाइको अधिकतम गति २४ देखि ५५ किलोमिटर प्रति घण्टा रहेको छ ।
यसै गरी यस बाइकको रेन्ज १०० देखि १२० किलोमिटर रहेको छ । यस्तै, गन्तव्यको ग्राउन्ड क्लियरेन्स १५० मिलिमिटर छ भने यो फाइबर र पलास्टीकले बनेको हो । थापाका अनुसार गन्तव्य ईभी १००–एस मोटरसाइकलको मूल्य २ लाख ५० हजार रुपैयाँ निर्धारण गरिएको छ ।
प्रतिक्रिया