सिरियल किलर सोभराज आज थुनामुक्त

काठमाडौं । सिरियल किलर चाल्र्स सोभराज शुक्रबार केन्द्रिय कारागार सुन्धाराबाट थुनामुक्त हुदैँछन् ।

बुधबार सर्वोच्च अदाललते दिएको आदेशअनुसार उनी शुक्रबार जेलमुक्त हुने भएका हुन् । शोभराजलाई अध्यागमन विभागको जिम्मा लगाइने र अध्यागमनले स्वदेश फिर्तीको प्रक्रिया सुरु गर्ने बताइएको छ । बिहिबार राती छुट्न उनले नमानेपछि शुक्रबार अध्यागमन लैजाइने तयारी गरिएको छ । सर्वोच्चले उनलाई १५ दिनभित्र आफ्नै देश फ्रान्स पठाउन आदेश दिएको छ ।

बुधबार सर्वोच्चका न्यायाधीश सपना प्रधान मल्ल र तिलप्रसाद श्रेष्ठको इजलासले १० महिना कैद छुट दिँदै उनलाई थुनामुक्त गर्न बन्दी प्रत्यक्षीकरणको आदेश जारी गरेका थिए । जेलमा रहेको ६५ वर्षभन्दा माथि उमेर भएका जेष्ठ नागरिकले ७५ प्रतिशतभन्दा बढी सजाय काटिसकेको अवस्थामा कैद सजाय छुट दिन सकिने व्यवस्था छ ।