अपूर्व विरुद्धको मुद्दा फिर्ता लिन विवेकशील साझाको माग

काठमाडौं । कमेडियन अपूर्व क्षितिज सिंह विरुद्धको मुद्दा फिर्ता लिन विवेकशील साझा पार्टीले आग्रह गरेको छ।

कमेडियन सिंहमाथि जातीय भेदभाव गरेको, अपमानजनक वा अमानवीय व्यवहार गरेको, सामाजिक रीतिथितिमा खलल पुर्‍याएको र सार्वजनिक शान्ति खलल पुर्‍याएको अभियोग लगाएको छ। मुद्दा फिर्ता लिन सरकारले पहल गर्नुपर्ने विवेकशील साझा पार्टीको माग रहेको छ। ‘हामी उजुरीकर्तालाई मुद्दा फिर्ता लिएर सामाजिक सहिष्णुता कायम राख्न र सरकारलाई विशेष पहल कदमी लिन आग्रह गर्दछौं,’ विवेकशील साझा पार्टीको जारी विज्ञप्तिमा उल्लेख छ।

सिंहले यूट्युबबाट भिडिओ हटाएर माफी पनि मागिसकेको सन्दर्भमा माफी स्विकार्दै मुद्दा फिर्ता गर्नुपर्ने विज्ञप्तिमा छ।घटनाका पक्ष र विपक्षमा रहेका समुदायलाई उत्तेजित हुन नदिई सहज वातावरणका साथ विषयलाई टुङ्ग्याउन र मुद्दा दायर गरेकाहरूलाई पनि विश्वासमा लिएर समस्या समाधान गर्ने वातावरण सरकारले बनाउनुपर्ने विवेकशील साझाको माग रहेको छ।